- Auglýsing -
- Dominik Kuzmanovic markvörður Gummersbach og króatíska landsliðsins var í gær valinn handknattleiksmaður ársins í Króatíu, annað árið í röð.
- Gustavo Capdeville, annar markvarða portúgalska landsliðsins, hefur skrifað undir samning við TTH Holstebro í Danmörku frá og með næsta sumri. Hann leikur þar með undir stjórn Arnórs Atlasonar og verður liðsfélagi Jóhannesar Berg Andrasonar. Capdeville hefur árum saman verið markvörður Benfica í Portúgal.
- Hermt er að David Baruffet, fyrrverandi markvörður Barcelona og spænska landsliðsins, taki við starfi íþróttastjóra þýska liðsins MT Melsungen á næstunni. Baruffet er og hefur verið í svipuðu starfi hjá Dinamo Búkarest undanfarin ár eftir að hann hætti störfum hjá Barcelona. Sonur Davids, hornamaðurinn Ian Barruffet, lék með Melsungen á síðasta vetri sem lánsmaður frá Katalóníuliðinu.
- Michael Allendorf, íþróttastjóri Melsungen undanfarin þrjú ár, var leystur frá störfum í byrjun október.
- Þýski handknattleiksmaðurinn Max Beneke er sagður ætla að yfirgefa Füchse Berlin og ganga til liðs við Göppingen. Beneke fékk fá tækifæri með Berlínarliðinu og var leigður til Eisenach í haust. Hann telur sæng sína uppreidda hjá Füchse og ætlar sér að róa á önnur mið þegar leigutímanum hjá Eisenach verður lokið eftir því sem fram kemur í Stuttgarter Zeitung.
- Línumaðurinn Julius Fischer er sagður eftirsóttur og vafasamt þar af leiðandi talið að hann verði áfram í herbúðum Hannover-Burgdorf að loknu yfirstandandi keppnistímabili. Flensburg-Handewitt og Füchse Berlin eru sögð hafa áhuga á línumanninum sem er fjórði markahæsti línumaður þýsku 1. deildarinnar á eftir Elliða Snæ Viðarssyni, Johannes Golla og Jannik Kohlbacher.
- Auglýsing -
