- Auglýsing -
- Franska handknattleikskonan Alexandra Lacrabere hefur óvænt skrifað undir samning við TMS Ringsted sem leikur í næst efstu deild danska handknattleiksins. Lacrabere er 37 ára gömul hefur síðustu tvö ár leikið með Rapid Búkarest en var áður hjá fleiri af fremstu handknattleiksliðum Evrópu auk þess að leika 256 landsleiki fyrir Frakkland og skorað hátt í 900 mörk.
- Eftir því sem fram kemur í dönskum fjölmiðlum þá finnst Lacrabere tækifærið sem bauðst hjá Ringsted vera spennandi í lok ferilsins. Ringsted er með bækistöðvar á Sjálandi, ekki langt frá Kaupmannahöfn.
- Þess má til gamans geta að Harpa María Friðgeirsdóttir fyrrverandi leikmaður Fram gekk til liðs við TMS Ringsted á dögunum eins og handbolti.is sagði frá.
- Svíinn Per Johansson er óvænt hættur þjálfun hollenska kvennalandsliðsins í handknattleik þrátt fyrir starfssaming til 2026. Johansson segir landsliðið hafa þörf fyrir nýjan þjálfara. Hann tók við fyrir hálfu þriðja ári. Holland hafnaði í 6. sæti á EM 2022 undir stjórn Johansson og varð í fimmta sæti á HM á síðasta ári. Á Ólympíuleikunum í Frakklandi í síðasta mánuði tapaði hollenska landsliðið fyrir því danska í átta liða úrslitum.
- Hollenska landsliðið verður með íslenska landsliðinu í riðli á Evrópumóti kvenna undir lok þessar árs.
- Svartfellski handknattleiksmaðurinn Vuko Borozan hefur snúið til baka í herbúðir Vardar Skopje að lokinni eins árs dvöl hjá Al-Hada í Sádi Arabíu.
- Sænski landsliðsmaðurinn Jim Gottfridsson gengur til liðs við Pick Szeged í Ungverjalandi næsta sumar eftir 12 ár með þýska liðinu Flensburg. Frá þessu var sagt á laugardaginn en orðrómur var uppi á síðasta vetri um að Gottfridsson renndi hýru auga til ungverska liðsins.
- Sænska landsliðskonan Carin Strömberg hefur gengið til liðs við Vipers Kristiansand. Koma hennar til félagsins átti sér skamman aðdraganda eftir að franska liðið Neptunes de Nantes varð gjaldþrota á dögunum og leikmenn voru leystir undan samningi hver á fætur öðrum. Að vísu hefur Vipers einnig verið í fjárhagserfiðleikum. Í tilkynningu félagsins segir að koma Strömberg sé möguleg vegna þess að takist hafi að semja við tvo nýja samstarfsaðila sem leggja pening inn í félagið.
- Auglýsing -
