- Auglýsing -
- Slóvenar misstu mikilvægan leikmann úr Ólympíuhópi sínum í handknattleik karla í fyrradag þegar hægri hornamaðurinn Gašper Marguč meiddist. Ljóst er að hann verður ekki með landsliðinu á Ólympíuleikunum sem hefjast undir mánaðarlok.
- Ungur og efnilegur handknattleiksmaður, Petar Cikusa, sem vakið hefur mikla athygli með Barcelona verður ekki í Ólympíuhópi Spánar í handknattleik karla. Hann hafði æft með landsliðinu. Jordi Ribera landsliðsþjálfari telur vænlegra að Cikusa leiki með öflugu 20 ára landsliði Spánar sem hefur keppni á EM í Slóveníu á miðvikudaginn, fremur en að vera með A-landsliðinu á Ólympíuleikunum.
- Hin þrautreynda franska landsliðskona Méline Nocandy sagði eftir 12 marka tap, 34:22, heimsmeistara Frakka fyrir Evrópumeisturum Noregs í vináttuleik í Pau í gærkvöldi að engu væri líkara en hún og stöllur hennar hafi vaknað upp við vondan draum. Frakkar eru Ólympíumeistarar í handknattleik kvenna og ætla sér að vinna á ný á heimavelli eftir nokkrar vikur.
- Olivier Krumbholz þjálfari franska landsliðsins sagðist reikna með að hans lið gæti ekki leikið verr á morgun þegar franska landsliðið mætir norska liðinu í öðru sinni í vináttuleik.
- Forráðamenn Slovan Ljubljana ætla sér að herja á efstu liðin í úrvalsdeildinni á næstu leiktíð en liðið hafnaði í 9. sæti á síðustu leiktíð. Eins og kom fram á dögunum var Uros Zormann ráðinn þjálfari liðsins. Nú hafa sex sterkir leikmenn gengið til liðs við félagið á einu bretti.
- Auglýsing -
