- Auglýsing -
- Norska landsliðskonan Nora Mørk og sambýlismaður hennar, sænski landsliðsmaðurinn Jerry Tollbring, eignuðust sitt fyrsta barn miðvikudaginn 7. maí þegar Mørk fæddi dóttur. Hefur stúlkan verið nefnd Tyra Mørk Tollbring og er fyrsta barn foreldra sinna.
- Nora Mørk tók sér frí frá handbolta eftir Ólympíuleikana í Frakklandi í ágúst hvar hún varð ólympíumeistari með norska landsliðinu. Óvíst er hvort og þá hvenær hún snýr út á leikvöllinn aftur. Fjölskyldan býr í Esbjerg í Danmörku.
- Julian Köster, leikmaður Gummersbach verður fyrirliði þýska landsliðsins í dag gegn Tyrkjum í síðasta leiknum í undankeppni EM 2026. Johannes Golla fyrirliði fékk frí hjá Alfreð Gíslasyni landsliðsþjálfara. Þjóðverjar taka á móti Tyrkjum í Stuttgart. Alfreð stillir upp ungu liði að þessu sinni. Aðeins fjórir leikmenn fæddust fyrir aldarmót.
- Mikil endurnýjun á sér stað í sumar hjá danska úrvalsdeildarliðinu TMS Ringsted sem Ísak Gústafsson leikmaður Vals gengur til liðs við. Sjö leikmenn liðsins róa á önnur mið og eru forsvarsmenn félagsins nú í óða önn að semja við aðra í þeirra stað. Nýtt hlutafé er að koma inn í rekstur TMS Ringsted, sem er með bækistöðvar á Jótlandi, svo möguleiki er á að tryggja góðan rekstur á næstu leiktíð.
- Pol Valera leikmaður Barcelona er einn fimm leikmanna félagsins sem róa á ný mið í sumar. Valera hefur samið til eins árs við FC Porto. Hann kom til Barcelona frá Granollers fyrir tveimur árum en líkar ekki lífið í Barcelona og fær að fara þótt eitt ár sé eftir af samningnum við Barcelona.
- Tékkneska handknattleikskonan Jana Knedlikova hefur ákveðið að hætta í handknattleik í lok leiktíðar, 35 ára gömul. Knedlikova leikur nú með Slvaía Prag í heimalandi sínu og kom m.a. hingað til lands og lék við Val í átta liða úrslitum Evrópubikarkeppninnar.
- Knedlikova hefur sex sinnum verið í sigurliði Meistaradeildar Evrópu, með Györ frá Ungverjalandi og Vipers frá Noregi. Þegar Vipers varð gjaldþrota í janúar gekk hún til liðs við Slavía Prag. Hún hefur leikið 124 landsleiki fyrir Tékkland á síðustu 14 árum.
- Auglýsing -
