- Auglýsing -
- Óðinn Þór Ríkharðsson skoraði níu mörk, þar af eitt úr vítakasti, þegar Kadetten Schaffhaunsen vann Suhr Aarau, 42:31, áttundu umferðar A-deildar svissneska handknattleiksins í gær. Kadetten er efst í deildinni með 14 stig að loknum átta leikjum, er fjórum stigum á undan Suhr Aarau sem situr í öðru sæti.
- Loksins vann Ribe-Esbjerg leik í dönsku úrvalsdeildinni í handknattleik karla í gær. Liðið lagði nýliða Grindsted, 33:27, á heimavelli í fimmtu umferð. Elvar Ásgeirsson skoraði þrjú mörk og gaf tvær stoðsendingar. Ágúst Elí Björgvinsson var annan hálfleikinn í marki Ribe-Esbjerg og varði sjö skot, 32%. Einnig skoraði Ágúst Elí eitt mark en hann skorar með reglulegu millibili.
- Arnór Atlason og liðsmenn hans í TTH Holstebro unnu Skanderborg AGF, 35:31, á heimavelli í dönsku úrvalsdeildinni í gær og fór upp í 5. sæti deildarinnar með fimm stig eftir fimm leiki.
- Kristján Örn Kristjánsson, Donni, skoraði fimm mörk og gaf þrjár stoðsendingar fyrir Skanderborg AGF í leiknum í Holstebro í gær. Skanderborg AGF er stigi á eftir TTH Holstebro í níunda sæti.
- Stöðuna í dönsku úrvalsdeildinni í karlaflokki og í fleiri deildum í evrópskum handknattleik er að finna hér.
- Guðmundur Bragi Ástþórsson skoraði þrjú mörk, þar af tvö úr vítaköstum, þegar lið hans, Bjerringbro/Silkeborg, tapaði fyrir Aalborg Håndbold, 38:28, í Álaborg í gær en liðin eru í dönsku úrvalsdeildinni og Aalborg er meistari frá síðasta tímabili.
- Bjerringbro/Silkeborg er í fimmta sæti með sex stig að loknum fimm leikjum. Aalborg er tveimur stigum ofar.
- Elín Jóna Þorsteinsdóttir og samherjar í Aarhus Håndbold töpuðu illa fyrir Ikast, 35:19, á útivelli í fjórðu umferð dönsku úrvalsdeildarinnar í gær. Staðan var orðin afar erfið strax að loknum fyrri hálfleik þegar Ikast var 11 mörkum yfir, 19:8. Elín Jóna varði sex skot, 18%, þann tíma sem hún stóð í marki Aarhus en liðið hefur tvö stig.
- Stöðuna í dönsku úrvalsdeildinni í kvennaflokki og í fleiri deildum í evrópskum handknattleik er að finna hér.
- Viktor Gísli Hallgrímsson var ekki í leikmannahópi Wisła Płock þegar liðið vann Azoty Puławy, 40:31, á heimavelli í 6. umferð pólsku úrvalsdeildarinnar í gær. Wisła Płock er í efsta sæti deildarinnar með 18 stig, þremur stig fyrir ofan Industria Kielce sem á leik til góða.
- Auglýsing -
