- Auglýsing -
- Norski landsliðsmaðurinn Harald Reinkind leikur ekki með þýska liðinu THW Kiel næstu mánuðina vegna meiðsla sem hann hlaut í keppni Ólympíuleikanna í Frakklandi. Á meðan mun mikið mæða á Dananum Emil Madsen sem kom til Kiel-liðsins í sumar.
- Tékkneski landsliðsmarkvörðurinn Tomas Mrkva verður einnig fjarri góðu gamni um tíma vegna meiðsla í hné. Kiel er hinsvegar vel sett markverði því Samir Bellahcene og Andreas Wolff standa ótrauðir vaktina á upphafs vikum tímabilsins með Mrkva frá keppni.
- Óvissa ríkir um hvenær þýski landsliðsmaðurinn Paul Drux leikur á ný með Füchse Berlin. Drux hefur verið frá keppni í hálft annað ár, ekki síst vegna hásinarslits og afleiðinga þess.
- Hópur manna sem stýrt hafa rekstri þýska handknattleiksliðsins HSV Hamburg undanfarin ár hefur sagt af sér. Meðal þeirra er Martin Schwalb fyrrverandi þjálfari liðsins á velmegtarár þess fyrir hálfum öðrum áratug. Margt gekk á í vor og fram eftir sumri eftir að stjórn þýsku deildarkeppninnar hafnaði HSV Hamburg um keppnisleyfi vegna mikilla skulda félagsins og óvissu um að það gæti staðið undir þeim. Eftir þjark tókst HSV að fá endurnýjað keppnisleyfi en það kostaði m.a. átök innan stjórnar félagsins.
- Auglýsing -
