- Auglýsing -
- Sandra Erlingsdóttir var í sigurliði TuS Metzingen sem sótti heim Göppingen í gær í þýsku 1. deildinni í handknattleik og vann með níu marka mun, 35:26. Sandra skoraði tvö mörk og gaf eina stoðsendingu í leiknum. Metzingen var þremur mörkum yfir í hálfleik, 15:12. Liðið er áfram í 7. sæti þýsku 1. deildarinnar með 16 stig eftir 16 leiki. Ludwigsburg er efst með 30 stig.
- Eftir þrjá sigurleiki í fyrstu þremur umferðum riðlakeppni Evrópudeildarinnar í handknattleik kvenna tapaði þýska liðið, Blomberg-Lippe, fyrir KGHM MKS Zaglebie Lubin, 29:27, í Póllandi í gær þegar fjórða umferð 16-liða úrslita riðlakeppninnar hófst.
- Andrea Jacobsen skoraði eitt mark fyrir Blomberg-Lippe eins og Ida Margrethe Hoberg fyrrverandi leikmaður KA/Þórs. Díana Dögg Magnúsdóttir var ekki með. Hún er að jafna sig af ristarbroti.
- KGHM MKS Zaglebie Lubin og Blomberg-Lippe er í tveimur efstu sætum C-riðils Evrópudeildarinnar með sex stig eftir fjórar umferðir. Tvær umferðir eru eftir.
- Þýska handknattleiksliðið Borussia Dortmund hefur samið við hollensku landsliðskonuna Lois Abbingh. Hún var ein þeirra handknattleikskvenna sem stóð uppi án félags þegar Vipers Kristiansand lagði upp laupana í ársbyrjun. Abbingh samdi við Dortmund til eins og hálfs árs og verður þar m.a. liðsfélagi Emmu Olsson sem lék með Fram leiktíðina 2021/2022.
- Auglýsing -
