- Auglýsing -
- Sigurður Hjörtur Þrastarson og Svavar Ólafur Pétursson dæmdu viðureign Bjerringbro/Silkeborg og Flensburg í 4. og síðustu umferð Evrópudeildarinnar í handknattleik karla sem fram fór á Jótlandi í gær.
- Óðinn Þór Ríkharðsson var markahæstur hjá Kadetten Schaffhausen þegar liðið tapaði fyrir Serbíumeisturum Vojvodina í Novi Sad í gærkvöld í fjórðu og síðustu umferð riðlakeppni 16-liða úrslita Evrópudeildarinnar í handknattleik karla, 24:21. Óðinn Þór skoraði sjö mörk. Tapið breytti engu um stöðu Kadetten sem hafnaði í þriðja sæti riðilsins og leikur við Füchse Berlin í tveimur leikjum um keppnisrétt í átta liða úrslitum.
- Viktor Gísli Hallgrímsson var ekki með Nantes þegar liðið vann Hannover-Burgdorf í síðustu umferð 1. riðils í 16-liða úrslitum Evrópudeildarinnar í handknattleik karla í Nantes í Frakklandi, 33:26. Eins og áður hefur komið fram er Viktor Gísli meiddur á olnboga og varð m.a. að draga sig út úr landsliðinu í gærmorgun af þeim sökum. Nantes vann riðilinn og er komið í átta liða úrslit Evrópudeildarinnar. Viktor Gísli sagði við Vísir í gær að óvíst væri hversu lengi hann verði frá keppni.
- Mikkel Hansen leikur ekki með Aalborg Håndbold næstu vikurnar vegna álagsmeiðsla á mjöðm sem hafa gert honum lífið leitt upp á síðkastið, að sögn Stefan Madsen þjálfara Aalborg.
- Franska handknattleikskonan Deborah Lassource gengur til liðs við Borussia Dortmund í sumar þegar samningur hennar við Paris 92 rennur út. Lassource var í sigurliði Frakka á heimsmeistaramótinu í desember sl. Hún samdi við þýska liðið til tveggja ára.
- Auglýsing -
