Tryggvi Þórisson í leik með Sävehof. Hann er núna leikmaður Elverum. Ljósmynd/Guðmundur Svansson
- Auglýsing -
Tryggvi Þórisson var ekki í leikmannahópi Elverum í gær þegar liðið lagði Runar, 35:34, á heimavelli í upphafsleik 4. umferðar norsku úrvalsdeildarinnar í gærkvöld. Elverum er efst með sex stig eftir fjóra leiki. Kolstad og Drammen hafa einnig sex stig hvort en hafa aðeins lagt að baki þrjár umferðir.
Birta Rún Grétarsdóttir skoraði eitt mark þegar lið hennar, Fjellhammer, tapaði fyrir Byåsen, 28:23, í 16-liða úrslitum norsku bikarkeppninnar í gærkvöld.
Nicolai Daling leikmaður norska liðsins Bergen hefur verið úrskurðaður í tveggja leikja bann fyrir að stökkva yfir auglýsingaskilti, ráðast á áhorfanda, taka af honum gjallarhorn og kasta því inn á leikvöllinn. Atvikið átti sér stað í viðureign Bergen og Follo.
Auk þess var Follo sektað um 10 þúsund norskar krónur, 121 þúsund kr. íslenskar. Áhorfandinn sem átti gjallarhornið kom úr röðum stuðningsmanna Follo. Hann fór yfir strikið í hrópum sínum að Daling, að mati aganefndar norska handknattleikssambandsins.
