- Auglýsing -
- Óðinn Þór Ríkharðsson og liðsfélagar í Kadetten Schaffhausen unnu HC Küsnacht, 36:24, í átta liða úrslitum bikarkeppninnar í Sviss í gærkvöld. Þetta var annar leikur Kadetten á tveimur dögum því í fyrradag mætti liðið Wacker Thun í deildinni og vann einnig. Óðinn Þór skoraði þrjú mörk í leiknum í gær í fjórum skotum og er þar með kominn í kærkomið jólafrí. Hann er í HM-hópnum sem var opinberaður í gær.
- Kadetten Schaffhausen stendur vel að vígi í deildinni, er lang efst, og hefur öðlast sæti í undanúrslitum bikarkeppninnar. Á móti kemur að Kadetten komst ekki í 16-liða úrslit Evrópudeildarinnar þar sem liðið hefur verið fastagestur undanfarin tímabil.
- Áfram er Ribe-Esbjerg í basli í dönsku úrvalsdeildinni. Í gær tapaði liðið enn einum leiknum, að þessu sinni fyrir Nordsjælland í Helsinge–hallen á norður-Sjálandi, 29:25. Elvar Ásgeirsson skoraði fjögur mörk í sjö skotum fyrir Ribe-Esbjerg. Ágúst Elí Björgvinsson náði sér ekki á strik í markinu. Hann varði 1 skot af 12.
- Ribe-Esbjerg er í 13. sæti af 14 liðum dönsku úrvalsdeildarinnar með fimm stig að loknum 17 leikjum.
- Auglýsing -
