Molakaffi: U19, Janus, Tumi, Elvar, Ágúst, Guðmundur, Einar

• U19 ára landslið karla í handknattleik leikur við sænska landsliðið í dag í undanúrslitum forsetabikarsins á heimsmeistaramótinu í Króatíu. Íslenska liðið kom til Rijeka síðdegis í gær eftir rúmlega vikudvöl við leiki í Koprivnica.
  
• Viðureign Íslands og Svíþjóðar hefst klukkan 18 og verður handbolti.is með textalýsingu auk þess sem streymi frá leiknum verður aðgengilegt á forsíðu handbolti.is.
  
• Sigurlið leiksins mætir annað hvort Svartfjallalandi eða Marokkó í úrslitaleik forsetabikarsins á morgun. Tapliðið leikur um 19. sæti heimsmeistaramótsins, einnig á morgun.

HMU19: Dagskrá og úrslit síðustu leikja mótsins

Myndir frá morgunfundi piltanna með þjálfurum í Rijeka í morgun þar sem lagt var á ráðin fyrir leikinn við Svía.

• Janus Daði Smárason skoraði eitt mark þegar Evrópumeistarar SC Magdeburg unnu 2. deildarliðið Dessau–Roßlauer HV 06 með 16 marka mun, 39:23, á æfingamóti í fyrradag. Philipp Weber skoraði flest mörk fyrir Magdeburg, sjö. Ómar Ingi Magnússon lék ekki með en hann er að jafna sig eftir meiðsli og aðgerð þeirra vegna í upphafi ársins. Eins og kom fram á dögunum er ekki reiknað að Ómar Ingi taki þátt í fyrstu leikjum Magdeburg á tímabilinu. Gísli Þorgeir Kristjánsson verður frá keppni fram í byrjun næsta árs.
  
• Tumi Steinn Rúnarsson og samherjar gerðu annað jafntefli í röð í æfingaleik í gær þegar þeir mættu Elbflorenz frá Dresden, 31:31. Bæði leika í þýsku 2. deildinni sem hefst um mánaðarmótin.

• Elvar Ásgeirsson skoraði fjögur mörk þegar Ribe-Esbjerg vann Kolding með 10 marka mun, 33:23, í æfingaleik í gær. Ágúst Elí Björgvinsson, markvörður, kom lítið sem ekkert við sögu í leiknum. Sænski markvörðurinn Niklas Kraft sem kom til Ribe-Esbjerg frá Ystad í sumar stóð vaktina allan leikinn og varði vel, eftir því sem fram kemur í tilkynningu félagsins. Ribe-Esbjerg mætir SønderjyskE í æfingaleik á laugardaginn.
  
• Fredericia HK, liðið sem Guðmundur Þórður Guðmundsson þjálfar og Einar Þorsteinn Ólafsson leikur með, vann Lemvig–Thyborøn, 31:25, í æfingaleik í gær eftir að hafa verið þremur mörkum yfir að loknum fyrri hálfleik, 18:15. Einar Þorsteinn skoraði ekki mark í leiknum.