- Auglýsing -
- Úlfhildur Tinna Lárusdóttir hefur ákveðið að taka fram handknattleiksskóna á nýjan leik eftir fjarveru vegna meiðsla og vera með Aftureldingu í Grill 66-deildinni á næstu leiktíð. Hún er uppalin í Aftureldingu og spilaði með yngri landsliðum Íslands á sínum tíma.
- Aftur varð Allan Norðberg, leikmaður Evrópubikarmeistara Vals, markahæstur í færeyska landsliðinu þegar það mætti landsliði Japans öðru sinni í vináttuleik í Tókýó í gær. Eins og í fyrri leiknum, sem Færeyingar unnu, 30:29, skoraði Allan sjö mörk. Að þessu sinni eitt úr vítakasti. Færeyingar töpuðu leiknum í gær, 31:25, eftir að hafa verið fjórum mörkum undir í hálfleik, 14:10.
- Leikirnir tveir eru liður í undirbúningi japanska landsliðsins fyrir Ólympíuleikana sem hefjast undir lok þessa mánaðar.
- Liðin sem léku til úrslita á heimsmeistaramóti kvenna í handknattleik, Frakkland og Noregur, mætast í vináttuleik í Frakklandi í kvöld. Leikurinn er sá fyrri af tveimur milli liða þjóðanna og er hluti af undirbúningi fyrir Ólympíuleikana. Síðari viðureignin verður á laugardaginn, einnig í Frakklandi.
- Þórir Hergeirsson landsliðsþjálfari Noregs lætur ekki þar við sitja því lið hans leikur við danska landsliðið í Gjøvik 16. júlí. Tveimur dögum síðar mætast norska og danska liðið í Kaupmannahöfn. Handknattleikskeppni kvenna á Ólympíuleikunum hefst 28. júlí.
- Auglýsing -
