Serbneski handknattleiksmaðurinn Igor Mrsulja hefur skrifað undir eins árs framlengingu á samningi sínum við Víking. Mrsulja kom til Víkinga fyrir tveimur árum og hefur leikið með liði félagsins jafnt í Grill66-deildinni og í Olísdeildinni.
Mrsulja kom til Gróttu fyrir þremur árum og var aðeins eitt tímabil áður en Víkingur kom til sögunnar í hans lífi. Auk þess að leika með Víkingsliðinu hefur Mrsulja unnið í íþróttahúsinu í Safamýri eftir að félagið tók við rekstri þess við flutning Fram í Grafarholt sumarið 2022.
Víkingur féll úr Olísdeildinni í vor og leikur þar með í Grill 66-deildinni á komandi leiktíð. Forráðamenn Víkings hafa blásið til sóknar og m.a. ráðið Aðalstein Eyjólfsson þjálfara meistaraflokks karla og yfirmann handknattleiksmála eins og kom fram í byrjun júní.
