Afturelding og FH mætast í fjórða sinn í úrslitum um Íslandsmeistaratitilinn í handknattleik karla að Varmá á miðvikudagskvöld. FH tryggir sér Íslandsmeistaratitilinn með sigri í leiknum. Takist Aftureldingu að vinna kemur til oddaleiks á sunnudaginn í Kaplakrika. Miðasala á fjórða leikinn hefst á næstu klukkustundum á stubb.is.
Þriðja viðureignin í Kaplakrika í gær var hnífjöfn og æsilega spennandi að viðstöddum hátt í 2.000 áhorfendum. Simon Michael Guðjónsson skoraði sigurmarkið, 27:26, þremur sekúndum fyrir leikslok í hraðri gagnsókn FH undir stjórn Arons Pálmarssonar. Níu sekúndum fyrir leikslok jafnaði Jakob Aronsson metin fyrir Aftureldingu, 26:26.
Sjá einnig: Myndskeið: Ótrúlegar lokasekúndur í Kaplakrika
Jói Long ljósmyndari var að vanda í Kaplakrika í gærkvöld og festi augnablikin á mynd, m.a. þegar Símon Michael var í þann mund að skora sigurmarkið.
Hér fyrir neðan úrval af myndum Jóa Long frá leiknum í Kaplakrika.
