Nokkrir tugir Íslendinga með Sérsveitina, stuðningsmannasveit landsliðanna í handknattleik, studdu dyggilega við bakið á landsliðinu í leikjum þess í riðlakeppni heimsmeistaramótsins kvenna í Porsche Arena síðustu daga.
Stuðningurinn var íslensku leikmönnunum afar mikilvægur auk þess sem víst er að mörgum þótti vænt um að sjá fjölskyldur sínar.
Sérsveitin lét sitt ekki eftir liggja. Enn og aftur sýndi það dugmikla og fórnfúsa fólk sem að baki Sérsveitinni stendur elju og metnað að styðja íslenska handboltalandsliðið í gegnum súrt og sætt.
Fram undan er flutningur hjá landsliðinu. Leikmenn, þjálfarar og starfsfólk kveður Stuttgart í dag og heldur norður á bóginn innan Þýskalands. Ferðinni verður heitið til Dortmund þar sem leikir milliriðlakeppninnar hefjast á morgun, þriðjudag. Eftir því sem næst verður komist mun fækka verulega í stuðningsmannahópnum og jafnvel ekki reiknað með fleiri en 10 Íslendingum á pöllunum í Westfalenhallen.
Blaðamaður og ljósmyndri Handbolti.is halda áfram að fylgja landsliðinu eftir eins lengi og liðið verður með í keppninni.
Myndaveisla frá sigurleiknum á Úrúgvæ
Hafliði Breiðfjörð ljósmyndari myndaði stuðningsmenn íslenska landsliðsins sem voru á sigurleiknum við Úrúgvæ í gær.
-Smellið á myndirnar til að sjá þær stærri.
