Tugir þúsunda íbúa Zagreb tóku á móti Degi Sigurðssyni og leikmönnum króatíska landsliðsins á Ban Jelačić-torgi í Zagreb eftir hádegið í dag þegar liðið kom heim frá Ósló eftir að hafa hlotið silfurverðlaun á HM í handknattleik í gær. Fjölmiðlar í Zagreb segja að fjöldinn hafi verið svipaður og þegar tekið var á móti fótboltalandsliðinu þegar það vann silfurverðlaun á HM í Rússlandi 2018.
Áður en landsliðið mætti á torgið höfðu herþotur króatíska hersins tekið á móti flugvél landsliðsins við landamærin og fylgt henni inn til lendingar á Franjo Tuđman-alþjóðaflugvellinum rétt utan við Zagreb.
Eins og títt er á þessum slóðum voru rauð blys ekki spöruð í skrúðgöngu fólks að torginu þar sem sett hafði verið upp svið þar sem leikmenn og þjálfari stigu fram þökkuðu fyrir stuðninginn um leið og þeir voru hylltir. Domagoj Dunvjak þakkaði sérstaklega öllum fyrir stuðninginn um leið hann lauk sérstöku loforði á Dag þjálfara.
Markvörðurinn Ivan Pesic tilkynnti að hann ætlaði að fylgja fordæmi Duvnjak og Igor Karacic og nota tækifærið til þess að kveðja landsliðið. Dagur sagði Peric eiga skilið einstakar þakkir fyrir framlag sitt og vísaði sennilega til þess þegar Peric lokaði markinu á síðustu mínútunum gegn Ungverjum í sigurleik Króata, 31:30, í átta liða úrslitum keppninnar.
Ekki fylgir sögunni hvort Dagur, sem er liðtækur gítarleikari og lagasmiður, hafi tekið lagið með hljómlistarmönnum sem stigu á svið með leikmönnum á Ban Jelačić-torgi.
