Þjálfari færeyska karlalandsliðsins í handknattleik, Peter Bredsdorff-Larsen, átti sér einskis ills von þegar hann var í beinni útsendingu hjá danska sjónvarpinu úr klefa færyska landsliðsins eftir að liðið tryggði Færeyingum sæti á Evrópumeistaramótinu í handknattleik karla á næsta ári.
Glatt var á hjalla í klefanum meðal leikmanna færeyska landsliðsins. Bredsdorff-Larsen var rétt byrjaður skýra út af hverju Færeyingar hafi náð jafn stórkostlegum árangri og raun ber vitni um þegar grallarar úr hópi leikmanna helltu bjór yfir þjálfarann, honum að óvörum.
Viðtalið flosnaði fljótlega upp og eftir stóðu Bredsdorff-Larsen, leikmenn færeyska landsliðsins skellihlæjandi auk fréttamanns danska sjónvarpsins heima í Danmörku sem sagðist aldrei hafa tekið skemmtilegra viðtal.
Bredsdorff-Larsen, sem er 55 ára gamall, tók við þjálfun færeyska landsliðsins fyrir tveimur árum og þykir hafa komið meiru festu á leik landsliðsins. Undir stjórn Bredsdorff-Larsen varð Bjerringbro/Silkeborg danskur meistari í karlaflokki fyrir nokkrum árum. Einnig var hann aðstoðarmaður Guðmundar Þórðar Guðmundssonar á árum hans með danska landsliðið.
