U19 ára landslið Íslands í handknattleik karla leikur kvöld til úrslita á Sparkassen cup, alþjóðlega handknattleiksmótinu í Merzig í Þýskalandi. Það var staðreynd eftir að íslensku piltarnir lögðu landslið Norður Makedóníu, 30:27, í undanúrslitaviðureign í hádeginu í dag. Íslenska landsliðið hefur þar með unnið allar fjórar viðureignir sínar á mótinu.
Síðar í dag kemur í ljós hvort það verður þýska landsliðið eða það egypska sem verður mótherjinn í úrslitaleiknum sem hefst klukkan 19. Um leið og það liggur fyrir hver verður andstæðingurinn verður fréttin uppfærð.
Hér fyrir neðan er myndskeið af leikmönnum íslenska landsliðsins fagna þegar sigurinn á Norður Makedóníu var í höfn.
Fyrri hálfleikur gegn Norður Makedóníu var jafn og staðan eftir því, 12:12, þegar hann var að baki. Fljótlega í síðari hálfleik náði íslenska liðið fumkvæðinu og hélt því til leiksloka, eftir því sem fram kemur í frásögn á vef HSÍ.
Mörk Íslands: Elmar Erlingsson 8, Kjartan Þór Júlíusson 4, Hinrik Hugi Heiðarsson 4, Reynir Þór Stefánsson 4, Daníel Örn Guðmundsson 3, Eiður Rafn Valsson 3, Skarphéðinn Ívar Einarsson 3, Össur Haraldsson 1.
Varin skot: Ísak Steinsson 6, Breki Hrafn Árnason 2.
Mögulegt verður að fylgjast með úrslitaleiknum í kvöld gegn vægu gjaldi á eftirfarandi slóð:
https://solidsport.com/sparkassencup-merzig
