„Byrjunin hjá okkur var mjög góð og markvarslan var mjög góð allan tímann svo segja má að við höfum unnið það einvígi. Auk þess lékum við nægilega góðan sóknarleik til þess að vinna leikinn. Orkan var mikil í liðinu og mikil læti í höllinni, stuðningurinn var mjög góður. Þetta var leikur með miklum látum,“ sagði Dagur Sigurðsson landsliðsþjálfari Króatíu í samtali við handbolta.is í Zagreb Arena í kvöld eftir að króatíska landsliðið vann það íslenska með sex marka mun, 32:26, í milliriðlakeppni heimsmeistaramótsins.
Mest tíu marka munur
Króatar voru mest með 10 marka forskot í síðari hálfleik en þeir gerðu út um leikinn í fyrri hálfleik með því yfirspila íslenska liðið.
Sigurinn opnaði króatíska liðinu braut í átta liða úrslit á HM og gerði um leið nánast út um vonir íslenska landsliðsins. Alltént verður íslenska liðið að treysta á að Króatar misstígi sig gegn Slóvenum á sunnudagskvöld. Slóvenar hafa ekki að neinu að keppa.
Upphafskaflinn mikilvægur
Dagur sagði að kraftmikil byrjun sinna manna hafi verið afar mikilvæg.
„Íslenska liðið hefur fram til þessa leikið af miklu sjálfstrausti og því var sterk byrjun okkar mikilvæg. Þegar þú nærð að koma andstæðingnum strax þremur til fjórum mörkum undir í svona leik þá fara menn að hugsa of mikið vegna þess að hlutirnir gerast ekki af sjálfu sér,“ sagði Dagur ennfremur og bætti við að hann hafi lagt áherslu á að halda mönnum við efnið allt til loka leiksins því króatíska liðið varð að vinna með a.m.k. fjögurra marka mun til þess að eiga innbyrðis betri stöðu verði Egyptar, Króatar og Íslendingar jafnir að stigum á sunnudaginn.
Verðum að standa vaktina á sunnudag
Til þess að sigurinn í kvöld skili Króötum sæti í átta liða úrslitum verða þeir að vinna Slóvena á sunnudagskvöld. „Við verðum að standa vaktina á sunnudaginn. Nú þarf ég að koma strákunum í svefn og láta þá hlaða batteríin fyrir sunnudaginn,“ segir Dagur Sigurðsson landsliðsþjálfari Króatíu í samtali við handbolta.is.
Lengra hljóðritað myndskeiðsviðtal við Dag Sigurðsson er að finna hér fyrir ofan.
