Kristján Örn Kristjánsson og félagar í PAUC, Aix, unnu nauman sigur á Cesson Rennes á útivelli í frönsku 1. deildinni í kvöld, 24:23, eftir að hafa verið þremur mörkum yfir í hálfleik, 15:12. Þetta var fyrsti leikur PAUC í ríflega mánuð.
Donni skoraði fjögur mörk í leiknum og var markahæstur í liðinu ásamt öðrum. Alls hefur Donni skorað 21 mark í fjórum leikjum liðsins á leiktíðinni sem hefur verið æði slitrótt. PAUC hefur leikið alla fjóra leiki sína til þessa á útivelli. Hefur liðið unnið þrjá en tapað einum, fyrir PSG í fyrstu umferð. Enn er ekki fyrirséð hvenær fyrsti heimaleikurinn fer fram.
Leikurinn í dag var æsilega spennandi allt til loka. Rok Zaponsek, markvörður Cesson Rennes varði vítakast frá samherja Donna þegar sjö sekúndur voru eftir af leiknum. Leikmenn Cesson Rennes brunuðu fram í sókn og náðu skoti á markið sem Wesley Pardin, markvörður PAUC, varði í þann mund sem leiktíminn rann út.
