Stjarnan sótti tvö stig úr viðureign sinni við HK í Olísdeild kvenna í handknattleik í TM-höllinni í kvöld. Lokatölur voru 24:20, eftir að þremur mörkum skakkaði á fylkingum eftir fyrri hálfleik, 12:9.
Stjarnan er eftir sem áður í þriðja sæti og er stigi á eftir ÍBV sem á tvo leiki til góða og tekur annan leikinn út á morgun þegar Valur kemur í heimsókn til Vestmannaeyja.
HK rekur lestina í deildinni með stigin sín tvö eftir erfitt keppnistímabil og virðist talsvert þurfa til þess að koma í veg fyrir að Kópavogsliðið falli niður í Grill 66-deildina.
Stjarnan gerði það sem hún þurfti til þess að vinna leikinn. Sá mikli munur sem er á liðunum þegar litið er á stigatöfluna var ekki greinilegur að þessu sinni enda svo sem ekki ástæða til þess að keyra á fullri ferð.
Mörk Stjörnunnar: Anna Karen Hansdóttir 7, Eva Björk Davíðsdóttir 7/2, Lena Margrét Valdimarsdóttir 4, Britney Cots 2, Stefanía Theodórsdóttir 2, Helena Rut Örvarsdóttir 1, Anna Lára Davíðsdóttir 1.
Varin skot: Elísabet Millý Elíasardóttir 17, 48,6%.
Mörk HK: Aníta Eik Jónsdóttir 4, Sóley Ívarsdóttir 4, Alfa Brá Hagalín 4, Embla Steindórsdóttir 4, Jóhanna Lind Jónasdóttir 2, Inga Dís Jóhannsdóttir 2.
Varin skot: Skráningu var ábótavant hjá HBStatz og þess vegna er látið eiga sig að birta tölur.
