- Auglýsing -
Akureyringurinn Oddur Gretarsson átti stórleik í kvöld og skoraði 10 mörk þegar lið hans, Balingen-Weilstetten vann Ludwigshafen með eins marks mun í hörkuleik í 1. umferð þýsku 2. deildarinnar í handknattleik í kvöld, 34:33. Leikið var á heimavelli Ludwigshafen. Oddur lét sér ekki nægja að leika á als oddi heldur skoraði hann sigurmarkið dýrmæta úr vítakasti þegar leiktíminn var úti.
Oddur vann vítakastið upp á eigin spýtur þegar örfáar sekúndur voru eftir af leiknum.
Daníel Þór Ingason lét einnig til sín taka hjá Balingen liðinu. Hann skoraði tvö mörk og var aðsópsmikill í varnarleiknum. Fyrir vikið varð Daníel Þór m.a. að vera tvisvar utan vallar, í tvær mínútur í hvort skipti.
Tumi Steinn Rúnarsson glímir við meiðsli og lék ekki með HSC Coburg þegar liðið vann stórsigur á Konstanz, 34:22, á heimavelli. Tumi Steinn meiddist á nára í æfingaferð til Danmerkur fyrir fjórum viku en er óðum að jafna sig og verður vonandi mættur til leik fyrr en síðar.
Úkraínska meistaraliðið HC Motor tapaði í heimsókn sinni til Lübeck-Schwartau, 36:35. Roland Eradze er aðstoðarþjálfari HC Motor sem er gestalið í deildinni á þessu keppnistímabili.
- Auglýsing -
