Fyrir utan að taka þátt í beinum undirbúningi fyrir viðureignina við Noreg í þriðju og síðustu umferð riðlakeppni átta liða úrslita Evrópumóts 18 ára landsliða í dag þá tóku fimm leikmenn íslenska landsliðsins þátt í verkefni á vegum Handknattleikssambands Evrópu í dag sem nefnist Respect YourTalent. Alls tóku um 120 piltar þátt í námskeiðinu, fimm frá hverju þátttökuliði EM sem stendur nú yfir í Podgorica í Svartfjallalandi.
Allir eiga þeir sameiginlegt að hafa verið valdir maður leiksins í viðureignum á Evrópumótinu. Ágúst Guðmundsson, Dagur Árni Heimisson, Garðar Ingi Sindrason, Jens Bragi Bergþórsson og Jens Sigurðarson tóku þátt úr íslenska landsliðinu.
Á námskeiðinu, sem tekur um tvær stundir, var farið yfir með piltunum yfir líf atvinnumanns í handknattleik sem marga dreymir um. Ólafur Stefánsson og Carlos Prieto, fyrrverandi landsliðsmaður Spánar, jusu úr reynslubrunnum sínum fyrir drengina. Víst er að piltarnir komu ekki að tómum kofanum hjá Ólafi og Prieto.
Handknattleikssamband Evrópu hefur staðið fyrir þessum námskeiðum, Respect YourTalent, á síðustu Evrópumótum yngri landsliða, karla jafnt sem kvenna. Hefur tiltækið fallið í frjóan jarðveg.
