Ólafur Stefánsson kemur sterklega til greina sem næsti þjálfari þýska handknattleiksliðsins EHV Aue sem leikur í næst efstu deild. Þetta hefur handbolti.is samkvæmt heimildum.
Forráðamenn EHV hafa síðustu daga leitað logandi ljósi að þjálfara í stað Stephen Just sem þeir sögðu upp fyrir viku í vegna slaks árangurs liðsins í upphafsleikjum tímabilsins. Munu þeir m.a. hafa sett sig í samband við Ólaf sem sýndi áhuga.
Eftir því sem handbolti.is kemst næst stendur til að nýr þjálfari verði kynntur til leiks hjá EHV Aue á morgun eða á miðvikudaginn og líklegra sé en ekki að Ólafur verði fyrir valinu. Ólafur hefur ekki verið aðalþjálfari félagsliðs síðan hann þjálfaði karlalið Vals fyrir tæpum áratug.
Ólafur hefur ekki verið í þjálfun síðustu mánuði eftir að hann lét af störfum aðstoðarþjálfara HC Erlangen rétt áður en keppnistímabilið hófst í Þýskalandi í haust. Ólafi fannst framhjá sér gengið þegar nýr þjálfari var ráðinn til félagsins í sumar og sagði starfi sínu lausu.
Þekkt Íslendingalið
Íslendingar hafa lengi átt upp á pallborðið hjá EHV Aue og m.a. hefur Sveinbjörn Pétursson markvörður verið hjá liðinu frá 2020.
EHV Aue vann TuS N-Lübbecke á laugardaginn og lyfti sér þar með úr neðsta sæti 2. deildar Var þetta annar sigur liðsins á keppnistímabilinu. EHV kom upp úr 3. deild í vor eftir eins árs veru. Ljóst er að verk er að vinna fyrir nýjan þjálfara liðsins, hvort sem hann heitir Ólafur Stefánsson eða eitthvað annað.
Stöðuna í þýsku 2. deildinni og fleiri deildum í evrópskum handknattleik er finna hér.
