- Auglýsing -
- Heimsmeistaramót félagsliða í handknattleik hefst í Dammam í Sádi Arabíu í dag. Þrír íslenskir handknattleiksmenn verða þar í eldlínunni. Janus Daði Smárason og Ómar Ingi Magnússon leika með SC Magdeburg sem unnið hefur keppnina síðustu tvö ár, og Haukur Þrastarson er í liði Industria Kielce frá Póllandi. Allt eru þetta piltar frá Selfossi.
- Tólf lið taka þátt í mótinu og hefur þeim verið skipt niður í fjóra riðla. Haukur og félagar í Kielce mæta AST Al-Najma frá Barein í dag. Janus og Ómar eiga leik fyrir höndum á móti Al Khaleej frá Sádi Arabíu. Auk Kielce og Magdeburg leika evrópsku félagsliðin Barcelona og Füchse Berlin í keppninni til viðbótar við meistaralið frá nokkrum heimsálfum. Einnig er gestalið frá Sádi Arabíu.
- Stephan Just var í gær sagt upp starfi þjálfara hjá EHV Aue í þýsku 2. deildinni en Sveinbjörn Pétursson er markvörður liðsins. EHV Aue endurheimti sæti í 2. deild eftir ársveru í 3. deild. Hvorki hefur gengið né rekið hjá EHV Aue til þessa og rekur liðið lestina í 2. deild með tvö stig að loknum 10 leikjum. Ekki var leitað langt yfir skammt að eftirmanni Just. Philipp Braun aðstoðarþjálfari tekur við ásamt Michael Hilbig markvarðaþjálfara.
- Ungverska landsliðið í handknattleik karla vann pólska landsliðið í tvígang í vináttuleikjum um nýliðna helgi, 31:27 og 36:26. Ungverjar verða með íslenska landsliðinu í riðli á EM í janúar. Báðar viðureignir fór fram í Ungverjalandi. Þetta voru fyrstu leikir pólska landsliðsins eftir að Marcin Lijewski tók við starfi landsliðsþjálfara.
- Serbar, sem einnig verða í riðli með Íslendingum á EM, töpuðu fyrir Slóvenum á laugardaginn, 30:26, í vináttulandsleiki. Daginn eftir skyldu lið þjóðanna jöfn, 28:28.
- Sænski markvörðurinn Johan Sjöstrand kveður Bjerringbro/Silkeborg næsta sumar eftir fjögurra ára veru. Sjöstrand hefur lengi glímt við meiðsli en gerir sér vonir um að vera á leiðinni inn á beinu brautina til þess að ljúka leiktíðinni með Bjerringbro/Silkeborg. Óvíst er hvað tekur við hjá Sjöstrand eftir veruna á Jótlandi. Hann hefur víða komið við.
- Auglýsing -
