Íslenska landsliðið sigldi örugglega áfram í milliriðlakeppni heimsmeistaramótsins í Þýskalandi með öruggum sigri, 33:19, á landsliði Úrúgvæ í síðustu umferð C-riðils í Porsche Arena í Stuttgart í dag. Íslenska liðið gerði út um leikinn þegar í fyrri hálfleik. Þegar hálfleiknum var lokið skakkaði 10 mörkum á liðunum, 17:7, því íslenska í vil.
Þar með er Ísland komið í milliriðlakeppni heimsmeistaramóts kvenna í fyrsta sinn og kemst hjá þátttöku um forsetabikarinn líkt og var hlutskipti þess fyrir tveimur árum eftir að hafa hafnað í fjórða sæti riðilsins með minnsta mun.
Sennilega mætir íslenska landsliðið færeyska landsliðinu á þriðjudag, Svartfellingum á fimmtudag og Spánverjum á laugardag.
Reyndar komst íslenska landsliðið upp úr riðlakeppninni og í 16-liða úrslit á HM kvenna fyrir 14 árum í Brasilíu. Þátttökuþjóðir voru 24 en 32 nú en var fjölgað um átta frá og með 2021. Mótaskipulaginu var breytt um leið.
Viðureignin í dag var sú fyrsta á milli landsliða Íslands og Úrúgvæ í kvennaflokki. Munurinn á liðunum var gríðarlegur og segja má að það sé gott að íslenska liðið eigi ekki fyrir höndum fjóra svipaða leiki í forsetabikarnum.
Mörk Íslands: Sandra Erlingsdóttir 6/4, Thea Imani Sturludóttir 5, Elísa Elíasdóttir 4, Þórey Anna Ásgeirsdóttir 4, Dana Björg Guðmundsdóttir 3, Elín Klara Þorkelsdóttir 2, Lovísa Thompson 2, Katrín Tinna Jensdóttir 2, Alfa Brá Oddsdóttir Hagalín 2, Rakel Oddný Guðmundsdóttir 2, Díana Dögg Magnúsdóttir 1.
Varin skot: Hafdís Renötudóttir 7/1, 50% – Sara Sif Helgadóttir 5/1, 31%.
Handbolti.is var í Porsche Arena og fylgist með leiknum í textalýsingu hér fyrir neðan.
