Sara Dögg Hjaltadóttir, leikstjórnandi ÍR, var á dögunum valin í A-landsliðið í fyrsta sinn fyrir tvo leiki gegn Svartfjallalandi í undankeppni EM 2026. „Líðanin er mjög góð. Mér finnst það ótrúlega gaman og mjög gaman að fá tækifærið,“ segir Sara Dögg í samtali við handbolta.is
Á yfirstandandi tímabili hefur hún verið einn besti leikmaður Olísdeildarinnar og sýnt mikinn stöðugleika. Mikla athygli vakti þegar Sara Dögg, sem er markahæst í Olísdeildinni, var ekki á 35 manna lista Arnars Péturssonar landsliðsþjálfara fyrir HM 2025, sem þýddi að ekki var hægt að velja hana í lokahópinn hefði svo farið að einhver leikmaður dytti út úr honum.
Ekkert sem ég gat stjórnað
Sara Dögg viðurkennir að hafa verið svekkt að vera ekki eitt af nöfnunum á listanum.
„Já, alveg smá. Manni langar alveg að vera í landsliðinu en þetta var ekkert sem ég gat stjórnað. Ég var ekkert að pæla í þessu, ég var bara að hugsa um að bæta sjálfa mig. Ég hugsaði aðallega um það.
Auðvitað pældi maður í þessu því það var alltaf verið að ræða þetta svolítið mikið. Ég var alveg smá svekkt en ég gat ekki stjórnað þessu þannig að ég reyndi að einblína á sjálfa mig,“ segir hún.
Pældi eiginlega ekkert í því
Hvenær sástu að það væri raunhæft fyrir þig að komast í A-landsliðið?
„Ég veit það ekki alveg. Ég vissi ekkert hverju ég átti að búast við. Ég var auðvitað ekki á þessum 35 manna lista þannig að ég var ekkert að búast við því að vera valin ef ég á að vera alveg hreinskilin.
Mér finnst það bara frábært og er ótrúlega þakklát fyrir að hafa verið valin og fá tækifærið. Ég pældi eiginlega ekkert í því og reyndi að einblína á sjálfa mig, að bæta mig sjálfa sem leikmann og reyna að bæta liðið okkar ÍR,“ segir Sara Dögg.
Spurð hvort hún sé bjartsýn á að spila sinn fyrsta A-landsleik í komandi landsleikjaglugga í byrjun næsta mánaðar segir Sara Dögg:
„Auðvitað vonast maður alltaf til þess en ég er bara nýkomin inn í þetta. Ég þarf að komast inn í kerfin og allt það. Þetta er eitthvað sem ég stjórna ekki heldur. Ég verð að einblína á að hugsa um sjálfa mig og gera mitt besta. Svo kemur allt annað í ljós.“
