Óttast er að Guðmundur Ástþórsson, leikmaður Hauka, hafi meiðst illa á vinstri öxl þegar um fimm mínútur voru til leiksloka í viðureign Hauka og ÍBV í Hafnarfjarðarmótinu í handknattleik í Kaplakrika í kvöld. Sé svo er um reiðarslag að ræða fyrir Hauka og Guðmund Braga.
Guðmundur Bragi freistaði þess að stöðva Kára Kristján Kristjánsson línumann ÍBV en því miður lauk þeim viðskiptum þeirra þannig að Guðmundur Bragi féll í gólfið og fékk Kára Kristján svo að segja ofan á sig. Guðmundur Bragi var þjáður og hlaut aðhlynningu innanvallar áður en hann fór af leikvelli með tveggja mínútna refsingu í ofan á lag.
Óttast er að eitthvað hafi gefið sig í vinstri öxlinni, en of snemmt var að slá nákvæmlega föstu hvað gekk úr skorðum, rétt eftir leikinn þegar handbolti.is rabbaði við félaga Guðmundar Braga úr Haukaliðinu. Þeir voru hinsvegar áhyggjufullir.
Guðmundur Bragi er algjör lykilmaður í sóknarleik Hauka og ljóst að það verður skarð fyrir skildi ef hann missir af upphafsleikjum liðsins í Olísdeildinni sem hefst eftir rúman hálfan mánuð.
Tengdar fréttir:
