Í annað sinn á skömmum tíma hafa dómarar leikja á Íslandsmótinu í handknattleik ákveðið að fella niður rautt spjald og útilokun sem þeir hafa gefið í hita leiksins.
Nýrra tilfellið er útilokun með skýrslu sem Halldór Ingi Óskarsson leikmaður Víkings fékk í viðureign liðsins við Fram U í Grill 66-deild karla á síðasta föstudag. „Við nánari athugun er það mat dómara að ákvörðunin hafi verið röng og hafa þeir því óskað eftir að draga spjaldið til baka,“ segir í úrskurði aganefndar HSÍ sem birtur er á vef HSÍ.
Dómarar leiksins voru Bjarni Viggósson og Jón Karl Björnsson.
Aganefnd HSÍ féllst á ósk dómaranna. Þar af leiðandi getur Halldór Ingi tekið þátt í stórleiknum við HK í Kórnum á föstudaginn ásamt samherjum sínum.
Í síðustu viku var afturkallað rautt spjald sem Jóhann Birgir Ingvarsson, FH-ingur fékk í leik við ÍBV.
Fleiri mál afgreidd
Fleiri máli voru tekin fyrir á fundi aganefndar HSÍ í gær.
Jóhann Reynir Gunnlaugssson, leikmaður Víkings, og Arnór Þorri Þorsteinsson, leikmaður Þórs, fengu einnig rautt spjald og útlokun í leikjum liðanna sinna í 5. umferð. Jóhann í leik við Fram U og Arnór Þorri í viðureign gegn KA U.
Hvorugur fær leikbann en aganefnd bendir þeim á stighækkandi áhrifum útlokana vegna slíkra brota, skv. 2. mgr. 11. reglugerðar.
Eins og fyrr segir sækir Víkingur topplið Grill 66-deildar karla, HK, heim í Kórinn á föstudaginn klukkan 20.
Arnór Þorri og félagar í Þór frá ungmennalið Hauka í heimsókn í Höllina á Akureyri á föstudagskvöld klukkan 19.30.
Staðan í Grill 66-deild karla:
| HK | 5 | 4 | 1 | 0 | 167 – 135 | 9 |
| Valur U | 5 | 4 | 1 | 0 | 148 – 131 | 9 |
| KA U | 5 | 2 | 2 | 1 | 159 – 156 | 6 |
| Víkingur | 5 | 2 | 1 | 2 | 154 – 148 | 5 |
| Þór | 5 | 2 | 1 | 2 | 143 – 144 | 5 |
| Selfoss U | 5 | 2 | 1 | 2 | 176 – 177 | 5 |
| Fram U | 5 | 2 | 0 | 3 | 149 – 156 | 4 |
| Fjölnir | 4 | 1 | 1 | 2 | 122 – 130 | 3 |
| Haukar U | 4 | 1 | 0 | 3 | 108 – 112 | 2 |
| Kórdrengir | 5 | 0 | 0 | 5 | 123 – 160 | 0 |
