„Þetta heppnaðist mjög vel hjá okkur í dag. Við vorum í góðum takti nánast frá upphafi, fyrir utan smá stress í byrjun. Reynslan sem við höfum safnað að okkur síðustu ár skein síðan í gegn, við héldum ró okkar og unnum áfram samkvæmt plani,“ sagði Gísli Þorgeir Kristjánsson landsliðsmaður í handknattleik sem fór ásamt Janusi Daða Smárasyni á kostum í sóknarleik íslenska landsliðsins í 13 marka sigri á Ítölum í upphafsleik riðlakeppni Evrópumótsins í handknattleik í Kristianstad Arena í kvöld, 39:26.
Fá mistök
„Það var líka stór plús hjá okkur að mistökin voru fá sem varð til þess að munurinn jókst jafnt og þétt þegar á leikinn leið,“ sagði Gísli Þorgeir sem hrósaði Viktori Gísla Hallgrímssyni fyrir góðan leik sem lagði grunn að hraðaupphlaupum til þess að auðvelda verkið við að brjóta Ítalina á bak aftur.
„Ítalska liðið leikur mjög vel og það er virkilega erfitt að eiga við sóknarleikinn þeirra. Því er virðing mín á varnarmönnum okkar sem stóðu sig mjög vel,“ sagði Gísli Þorgeir.
„Það var mikil spenna í okkur fyrir leikinn og þess vegna erum við mjög léttir að hafa unnið góðan sigur. Næsta skref er að jafna sig vel eftir viðureignina og byrja á morgun að búa okkur undir næsta leik, gegn Póllandi á sunnudaginn,“ sagði Gísli Þorgeir Kristjánsson.
