HSÍ hefur ráðið Roland Eradze sem markmannsþjálfara íslenska karlalandsliðsins og yngri landsliða. Roland hefur undanfarna mánuði starfað með markvörðum karlalandsliðsins og verið í þjálfarateymi þess síðan fyrir HM í janúar.
„Síðastliðna mánuði hefur myndast einkar gott samband milli Rolands og markvarða íslenska liðsins og því heillaskref fyrir liðið að fá Roland inn í teymið til frambúðar,” segir í tilkynningu frá HSÍ dag.
Auk þess að vinna með A-landsliðinu er Roland ætlað að vera með markmannsþjálfun yngri landsliða ásamt því að fylgja eftir ungum og efnilegum íslenskum markvörðum sem valdir eru af afrekssviði HSÍ.
„Að fá Roland inn í yngri landsliðin okkar er heilla skref í okkar vegferð í markmannsþjálfun. Við eigum mikið af efnilegum markvörðum í yngri landsliðum okkar og finnst okkur mikilvægt að bjóða upp á góða þjálfun og eftirfylgni á landsliðsæfingum og þeim verkefnum sem snúa að HSÍ,” segir Jón Gunnlaugur Viggósson, íþróttastjóri HSÍ í tilkynningu sambandsins.
Roland hefur búið á Íslandi í um aldarfjórðung. Hann er fyrrverandi landsliðsmarkmaður Íslands og einnig Georgíu og á að baki rúmlega 50 landsleiki fyrir Ísland. Roland hefur á liðnum árum verið þjálfari hjá ÍBV en hefur áður þjálfað hjá Fram, Stjörnunni og FH. Þá var hann um þriggja ára skeið aðstoðarþjálfari úkraínska meistaraliðsins HC Motor.
Roland tók einnig nýverið við þjálfun markvarða hjá Fram frá og með næstu leiktíð. Hann mun þar með hafa í mörg markhorn að líta á næstu mánuðum.
