Rúnar Sigtryggsson hefur verið ráðinn þjálfari þýska 1. deildarliðsins DHfK Leipzig. Hann tekur við þjálfun nú þegar og stýrir liðinu út tímabilið næsta vor. Um leið hefur hann stýrt Haukum í síðasta sinn.
„Ég fer út í fyrramálið og beint í leik gegn Wetzlar á fimmtudaginn,“ sagði Rúnar við handbolta.is fyrir stundu þegar hann staðfesti fregnirnar um óvænt vistaskipti sín.
„Ég var ekkert að velta fyrir mér að fara út á ný þegar framkvæmdastjóri Leipzig hafði samband við mig í síðustu viku og gerði mér tilboð. Eftir að ljóst var að vinnuveitendur mínir voru tilbúnir að gefa mér leyfi að fara þá sló ég til,“ sagði Rúnar ennfremur en hann er á heimleið með liði Hauka frá Kýpur þar sem það lék við Famagusta um nýliðna helgi í Evrópubikarkeppninni.
Rúnar tók við þjálfun Hauka í sumar.
Framundan er lífróður hjá Leipzig sem hefur farið illa af stað í þýsku 1. deildinni, aðeins krækt í fjögur stig í 10 leikjum og situr í 16. sæti af 18 liðum. „Ég geri mér grein fyrir því að mikil vinna er framundan,“ sagði Rúnar af yfirvegun í samtali við handbolta.is.
Viggó Kristjánsson landsliðsmaður leikur með liðinu, kom til þess í sumar. André Haber sem stýrði liðinu í upphafi tímabilsins var látinn taka pokann sinn á mánudaginn í síðustu viku.
Rúnar er gjörkunnugur handknattleiknum í Þýskalandi. Hann þjálfaði EHV Aue frá 2012 til 2016, Balingen 2016 til 2017 og einnig Eisenach frá 2004 til 2004 til viðbótar við að leika með þýsku liðunum Göppingen, Wallau Massenheim og Eisenach.
Eins hljóp Rúnar í skarðið sem þjálfari EHF Aue í lok árs 2020 og fram eftir árinu 2021 þegar þáverandi þjálfari veiktist alvarlega af covid.
Ekki liggur fyrir á þessari stundu hver tekur við af Rúnari sem þjálfari Hauka.
