Óánægja með árangur landsliðsins og samskipti bæði innan leikmannahóps íslenska liðsins og hjá Handknattleikssambandi Íslands er sögð vera ástæða þess að Guðmundur Þórður Guðmundsson hætti störfum landsliðsþjálfara í handknattelik karla í vikunni eftir fimm ára starf. Þetta hefur Morgunblaðið og mbl.is samkvæmt heimildum og segir frá í dag. Þar kemur ennfremur fram að Guðmundi Þórði hafi verið gert að hætta störfum.
Guðmundur Þórður er hættur þjálfun landsliðsins
„Heimildir mbl.is herma að bæði meðlimir í landsliðsnefnd HSÍ og leikmenn liðsins hafi viljað ljúka samstarfinu árið 2021, eftir að heimsmeistaramótinu í Egyptalandi lauk. Þess í stað var ákveðið að framlengja samning þjálfarans í tvígang.
Andrúmsloftið í herbúðum íslenska liðsins hefur ekki verið gott á síðustu stórmótum og var samband hans við leikmenn og aðra innan HSÍ komið í þann farveg að því var ekki viðbjargandi,“ segir ennfremur í frétt Morgunblaðsins og mbl.is.
Guðmundur Þórður tók við þjálfun landsliðsins í þriðja sinn á ferlinum árið 2018. Hann hafði áður sinnt starfinu frá 2001 til 2004 og aftur frá 2008 til 2012. Samanlagt hafði Guðmundur Þórður þjálfað íslenska landsliðið í 12 ár.
Leitin er að hefjast
Eftir því sem næst verður komist hyggjast forráðamenn HSÍ hefja alvarlega vinnu við leit að eftirmanni Guðmundar Þórðar í næstu viku. Þegar hafa margir verið nefndir til sögunnar, jafnt íslenskir sem útlendir þjálfarar.
Gunnar og Ágúst Þór taka við landsliðinu
Ágúst Þór Jóhannsson og Gunnar Magnússon, sem störfuðu með Guðmundi Þórði, stýra karlaladsliðinu á næstunni. Framundan á næstu vikum eru fjórir leiki í undankeppni EM 2024, tveir í mars og aðrir tveir í lok apríl.
