„Maður verður að vera sáttur við átta marka sigur,” sagði Össur Haraldsson markahæsti leikmaður Hauka í samtali við handbolta.is í kvöld eftir að Haukar unnu slóvenska liðið RK Jeruzalem Ormoz, 31:23, í fyrri viðureigninni í Evrópbikarkeppninni í handknattleik karla á Ásvöllum. Össur skoraði níu mörk, flest eftir hraðaupphlaup sem var eitt skæðasta vopn Hauka í leiknum gegn þungum leikmönnum slóvenska liðsins.
Síðari viðureign liðanna verður í Ormoz í Slóveníu á næsta laugardag.
„Við megum ekkert fara allt of hátt upp þrátt fyrir átta marka sigur. Síðari leikurinn er eftir og auk þess viðureign við Stjörnuna á miðvikudaginn í deildinnni,” sagði Össur sem hefur báða fætur á jörðinni þótt útlitið sé viðunandi.
Lengra myndskeiðsviðtal er við Össur ofar í þessari grein.
Sjá einnig: Hefði viljað vinna leikinn með meiri mun
Átta marka sigur Hauka – hefði getað verið stærri
