Sandra Erlingsdóttir og samherjar hennar í Metzingen unnu stórsigur á útivelli í kvöld á neðsta liði þýsku 1. deildarinnar, Waiblingen, 32:15 í upphafsleik 25. og næst síðustu umferðar deildarinnar. Með sigrinum endurheimti Metzingen sjötta sæti deildarinnar, alltént að sinni. Blomberg-Lippe er tveimur stigum á eftir og á leik til góða.
Waiblingen er fyrir löngu fallið í aðra deild. Liðsmenn hafa aðeins önglað saman tveimur stigum á tímabilinu í 25 leikjum.
Ef eitthvað er á annað borð að marka tölfræði sem gefin er upp á heimasíðu deildarkeppninnar þá skoraði Sandra fjögur mörk í leiknum. Ennfremur kemur fram að hún hafi átt sex markskot. Sandra átti einnig tvær stoðsendingar samkvæmt upplýsingum á sömu síðu en eftir því sem næst verður komist er undir hælin lagt hvort að upplýsingarnar séu réttar.
