Sigríður Hauksdóttir hefur framlengt samning sinn við deildar- og bikarmeistara Vals til eins árs, eða út leiktíðina vorið 2025.
Sigríður gekk til liðs við Val fyrir tveimur árum og fetaði þar með í fótspor ömmu sinnar og nöfnu, Sigríðar Sigurðardóttur sem lék allan sinn feril með Valsliðinu. Sigríður yngri lék með HK um árabil áður en hún skipti yfir til Vals. Þá átti Sigríður um nokkurt skeið sæti í A-landsliðinu.
Sigríður leikur í vinstra horni og deilir stöðunni með Lilju Ágústsdóttur enda hefur Valsliðið lagt metnað í að vera með tvo öfluga leikmenn í hverri stöðu.
„Það er gott að Sigga ákvað að vera áfram með okkur. Hún er klassa leikmaður og mikill karakter. Þetta eru því góðar fréttir,“ er haft eftir glöðum og sigursælum þjálfara deildar- og bikarmeistaranna, Ágústi Þór Jóhannssyni í tilkynningu handknattleiksdeildar Vals.
