Sigvaldi Björn Guðjónsson, landsliðsmaður í handknattleik og leikmaður pólska meistaraliðsins Vive Kielce, hlaut höfuðhögg í leik Kielce og rússneska liðsins Taganrog á æfingamóti í gær.
Sigvaldi rakst illa á sóknarmann rússneska liðsins eftir að hafa tekið á rás fram völlinn í kjölfar þess að sá rússneski missti boltann. Rússinn tók ekkert eftir að Sigvaldi ætlaði að hlaupa fram völlinn heldur tók á rás á eftir boltanum og hljóp þar með beint í flasið á Sigvalda.
Svo er að sjá á upptöku af atvikinu sem enni Sigvalda rekist í höku Rússans.
Forseti Vive Kielce, Bertus Servaas, segir í færslu á Twitter í morgun að Sigvaldi Björn taki ekki þátt í æfingaleik við þýska liðið Füchse Berlin í dag vegna höfuðhöggsins. Hann greinir ekki nánar frá líðan hans.
Servaas svarar stuðningsmanni liðsins sem spyr eftir stöðunni á Hauki Þrastarsyni. Servaas segir að Haukur fái áfram þann tíma sem hann þarf til að jafna sig af meiðslum. Allir standi við bakið á honum í þeim efnum. Haukur sleit krossband í október í fyrra.
- Var svo fjarlægur draumur fyrir nokkrum árum
- Líður ógeðslega vel – þetta var rosalega gaman
- Valur í úrslit Evrópubikarsins – blað brotið í kvennahandbolta á Íslandi
- Andrea og Díana taka þátt í úrslitahelgi Evrópudeildarinnar
- Íslendingaliðið tapaði á heimavelli
