Blomberg-Lippe tapaði fyrsta úrslitaleiknum gegn HB Ludwigsburg um þýska meistaratitilinn í handknattleik kvenna í kvöld, 36:29. Leikið var á heimavelli HB Ludwigsburg en liðið hefur verið það öflugasta í þýskum kvenna handknattleik um árabil. Næst mætast liðin á heimavelli Blomberg-Lippe á laugardaginn og vinni HB Ludwigsburg einnig þá viðureign hreppir liðið þýska meistaratitilinn fjórða árið í röð.
HB Ludwigsburg var sex mörkum yfir að loknum fyrri hálfleik.
Díana Dögg Magnúsdóttir skoraði þrjú mörk, gaf fimm stoðsendingar, var með með tvö sköpuð færi, stal boltanum tvisvar og varði eitt skot í vörninni undir leikslok.
Andrea Jacobsen lék ekki með Blomberg-Lippe í kvöld. Ekki fremur en á móti Dortmund á síðasta laugardag í oddaleik liðanna í undanúrslitum.
HB Ludwigsburg skoraði átta fyrstu mörk leiksins og níu af fyrsti ellefu. Blomberg-Lippe skoraði tvö síðustu mörk leiksins.
Jenny Behrend skoraði sjö mörk fyrir HB Ludwigsburg og var markahæst. Maxi Mühlner og Nieke Kühne skoruðu sex mörk hvor fyrir Blomberg-Lippe og voru atkvæðamestar við að skora mörk.
