„Ég vil vera sókndjarfur þjálfari,“ sagði Snorri Steinn Guðjónsson landsliðsþjálfari í handknattleik karla spurður um þær breytingar sem hann vonast til þess að gert á leik íslenska landsliðsins þegar fram líða stundir. Snorri Steinn var ráðinn landsliðsþjálfari um mitt árið og í gær valdi hann sinn fyrsta landsliðshóp fyrir æfingabúðir og tvo vináttuleiki við Færeyinga í Laugardalshöll 3. og 4. nóvember.
Fingaförin koma í ljós
Snorri Steinn segist vonast til þess að þegar leikjum landsliðsins fjölgar undir hans stjórn þá komi fingraför hans betur í ljós á leik liðsins.
„Ég stefni á að hraðinn í leiknum verði meiri auk þess sem einhverjar breytingar verða einnig á varnar- og sóknarleik,“ sagði Snorri Steinn sem gat þess að m.a. reiknaði hann með nokkrum breytingum á varnarleiknum sem verði ekki leikinn eins framarlega og gert var undir stjórn fyrri landsliðsþjálfara.
Ekki hægt að yfirfæra allt
„Þegar kemur að því að ákveða hvað skal gera og hvað skal ekki gera er ljóst að tíminn er takmarkaður sem ég hef með liðið hverju sinni. Ég verð örugglega að velja og hafna. Það er ekki hægt að yfirfæra allt frá félagsliði yfir á landslið, hvað þá á nokkrum dögum. Félagsliðaþjálfari er með liðið á æfingum flesta daga nær allt allt árið meðan landsliðsþjálfari hefur hópinn saman í nokkra daga í fáein skipti yfir árið. Þjálfarinn stendur þar með óneitanlega frammi fyrir því að verða að velja og hafna hvað gera skal.
Hinsvegar er alveg ljóst að ég vil hafa mikinn hraða á mínu liði og „dýnamik“. Það verður spennandi að sjá hversu langt ég kemst með liðið að þessu sinni á skömmum tíma og síðan aftur í aðdraganda Evrópumótsins. Eitt skref í einu,“ sagði Snorri Steinn af yfirvegun og bætti við.
Gerir ríkar kröfur til leikmanna
„Ég geri einfaldlega þá kröfu til landsliðsmanna að þeir verði fljótir að ná þeim breyttu áherslum sem ég vil gera og verði tilbúnir að leggja vinnu í að tileinka sér okkar leikstíl. Við kaupum okkur ekki tíma heldur verðum við allir að nýta sem allra besta þann takmarkaða tíma sem við höfum,“ sagði Snorri Steinn Guðjónsson landsliðsþjálfari í handknattleik karla í samtali við handbolta.is í gær.
Vináttuleikir Íslendinga og Færeyinga fara fram í Laugardalshöll föstudaginn 3. nóvember klukkan 19.30 og klukkan 17.30 laugardaginn 4. nóvember.
Tengdar fréttir:
Einn nýliði í fyrsta landsliðshópi Snorra Steins
„Ég held að sjálfsögðu öllu opnu áfram“
