HR stofan hefst á ný í dag, fimmtudaginn 16. janúar kl. 12:30, þar sem Háskólinn í Reykjavík hitar upp fyrir HM karla í handbolta með íþróttasérfræðingum, jafnt innan íþróttadeildar háskólans sem utan.
Það er Dr. Peter O‘Donoghue, prófessor við íþróttafræðideild HR, sem fer yfir spálíkan sem hann hefur gert fyrir mótið. Hann er þekktur víða fyrir vinnu sína, rannsóknir og kennslu á sviði frammistöðugreininga í íþróttum (e. sport performance) og vann m.a. að frammistöðugreiningum hjá enska knattspyrnusambandinu.
Peter gerði spálíkan fyrir EM í handbolta sem fram fór í Þýskalandi fyrra og spáði því að líklegast myndi Ísland enda í 7.-12. sæti. Svo fór að liðið lenti í 10. sæti og verður því spennandi að sjá hvort Peter reynist eins sannspár nú og þá.
Þá munu þeir Patrekur Jóhannesson, fyrrverandi landsliðsmaður í handbolta, og Arnar Pétursson, þjálfari landsliðs kvenna í handbolta, ræða við Kristján Halldórsson, kennara við íþróttafræðideild HR, um spána frá Peter, íslenska landsliðið, leikmennina og liðin sem Ísland mætir á mótinu.
HR stofan verður í streymi klukkan 12:30 og hægt að tengjast streyminu hér fyrir neðan.
