„Við höfum margt að sýna því við eigum margt inni að okkar mati,“ sagði Helena Rut Örvarsdóttir, landsliðskona í handknattleik, í samtali við handbolta.is vegna síðari viðureignar íslenska landsliðsins og þess slóvenska í undankeppni heimsmeistaramótsins sem fram fer í Schenkerhöllinni á Ásvöllum í kvöld.
Eftir 10 marka tap í fyrri viðureigninni í Ljubljana á laugardaginn, 24:14, er víst að við ramman reip verður að draga hjá íslenska liðinu. Helena Rut og félagar hafa síður en svo lagt árar í bát heldur búið sig af kostgæfni síðustu daga undir leikinn í kvöld sem hefst klukkan 19.45.
„Við erum staðráðnar í laga margt af því sem miður fór síðast og ná fram betri leik úti,“ sagði Helena Rut. Spurð hvort það væri frekar sóknarleikurinn en varnarleikurinn sem verði að taka framförum sagði hún að þessi atriði héldust í hendur.
„Það er mikilvægt að við keyrum meira á Slóvenana og fáum fleiri einföld mörk. Ég fann það í fyrri leiknum að eitt og annað má bæta í varnarleiknum þótt vissulega hafi margt smollið vel saman. Við fengum bara á okkur 24 mörk sem er fínt þótt hraðinn hafi ekki verið mjög mikill.
Við verðum að skora fleiri mörk en á laugardaginn. Það væri gott að flott að fá fleiri mörk eftir hraðaupphlaup og seinni bylgju. Hraðinn verður að vera meiri í okkar leik, það er einn styrkleiki okkar liðs,“ sagði Helena Rut Örvarsdóttir, landsliðskona í handknattleik.
Ein breyting var gerði á íslenska landsliðshópnum í morgun. Anna Úrsúla Guðmundsdóttir tekur sæti Mariam Eradze og verður væntanlega með Helenu Rut í hjarta varnarinnar í leiknum sem hefst klukkn 19.45 í Schenkerhöllinni á Ásvöllum. Áhorfendum verður ekki heimilaður aðgangur að en hægt verður að fylgjast með beinni útsendingu hjá RÚV.
