Stefán Rafn Sigurmannsson leikmaður Hauka var úrskurðaður í þriggja leikja bann af aganefnd HSÍ sem kom saman til aukafundar í gær vegna tveggja mála sem ekki tókst að ljúka á reglubundnum fundi nefndarinnar á þriðjudag. M.a. var beðið eftir greinargerð frá Haukum vegna máls sem sneri að Stefáni Rafni. Hann leikur ekki fleiri leiki með Haukum í Olísdeildinni á leiktíðinni en verður klár í slaginn í úrslitakeppninni verði Haukar með í henni.
Stefán Rafn hlaut tvær útilokanir vegna mjög grófrar og ódrengilegrar hegðunar eftir leik Hauka og Gróttu í Olísdeild karla fimmtudaginn 23. mars.
Í úrskurði aganefndar segir m.a.: „Með tilvísun í 10. og 11. gr. reglugerðar HSÍ um agamál er það niðurstaða aganefndar að leikmaðurinn er úrskurðaður í þriggja leikja bann. Við ákvörðun refsingar ber að líta til þess að samkvæmt skýrslu dómara er um tvö aðskilin brot er að ræða. Þá ber jafnframt að líta til þess að leikmaðurinn hefur sætt leikbanni á tímabilinu og horfir það til stighækkunar, sbr. 11. gr reglugerðar HSÍ um agamál. Aganefnd vekur jafnframt athygli á stighækkandi áhrifum leikbanna, skv. 1. mgr. 11. gr. sömu reglugerðar.“
Greinargerðar beðið frá ÍBV
Aganefnd frestaði í gær öðru sinni afgreiðslu á máli sem snertir Hinrik Huga Heiðarsson leikmann 3. flokks ÍBV meðan beðið er greinargerðar frá handknattleiksdeild ÍBV.
Hinrik Hugi hlaut útilokun með skýrslu vegna grófs leikbrots í leik ÍBV og HK í 3. flokki karla þann 26.03.2023. Aganefnd leit svo alvarlega á málið á fundi sínum á þriðjudaginn að hún lét þess getið í fundargerð sinni að hugsanlega verðskuldaði brot Hinriks Huga lengra en eins leiks banns.
Til stendur að úrskurða í málinu á næsta fundi aganefndar á þriðjudaginn eftir að greinargerði handknattleiksdeildar ÍBV hefur borist.
