Elias Ellefsen á Skipagøtu og Óli Mittún, stærstu stjörnur Færeyja, hristu báðir af sér meiðsli og léku frábærlega fyrir liðið þegar það gerði jafntefli við Sviss, 28:28, í fyrstu umferð D-riðils Evrópumótsins í Unity Arena í Bærum í Noregi í kvöld. Liðlega 6.000 Færeyingar voru á meðal áhorfenda og var stemningin sögð engri lík.
Elias hefur verið að glíma við þrálát meiðsli á öxl og Óli glímdi við eymsli í hásin í aðdraganda mótsins en þeir áttu báðir stórleik og voru markahæstir í liði Færeyja.
Færeyjar jöfnuðu metin og björguðu stigi undir blálokin. Vilhelm Poulsen, fyrrverandi leikmaður Fram, skoraði jöfnunarmarkið þegar örfáar sekúndur voru eftir. Sviss gat áður tryggt sér sigurinn en markskot 17 sekúndum fyrir leikslok missti marks og gaf Færeyingum kost á einni lokasókn sem þeir nýttu sér til þess að krækja í annað stigið.
Eftir jöfnunarmark Færeyja reyndu leikmenn landsliðs Sviss að tryggja sér sigurinn með skoti frá miðju en tíminn rann út áður en boltinn hafnaði í færeyska markinu.
Elias skoraði níu mörk og Óli var með sjö mörk.
Noam Leopold var markahæstur hjá Sviss með sjö mörk og Manuel Zehnder bætti við sex. Nikola Portner varði 13 skot í markinu.
Færeyjar mæta næst Svartfjallalandi á sunnudag. Sviss mætir þá Slóveníu sem vann Svartfellinga í miklum markaleik í kvöld, 41:40.
EM karla 2026 – úrslit, staðan og leiktímar
