„Eftir að hafa verið komnir sex mörkum undir þá var það frábær karakter hjá liðinu að koma til baka eftir að hafa verið sex mörkum undir og vinna annað stigið gegn sterku liði Portúgal,“ segir Einar Andri Einarsson annar þjálfari U20 ára landsliðs Íslands í handknattleik í samtali við handbolta.is eftir jafntefli við Portúgal í átta liða úrslitum á Evrópumóti 20 ára landsliða í Celje í Slóveníu í dag, 33:33. Ísland varð þar með fyrst liða á mótinu til að vinna stig af Portúgölum á mótinu. Lokakafli leiksins var ævintýralegur.
Ísak og Skarphéðinn tryggðu sætt stig
„Mér fannst strákarnir verðskulda stigið. Þeir börðust allan tímann. Við fengum slæman kafla í byrjun síðari hálfleiks eins og gegn Svíum en strákarnir sýndu það að þeir hafa lært af reynslunni,“ segir Einar Andri sem var í sjöunda himni með stigið góða sem getur reynst dýrmætt ef rétt spilast úr leikjunum tveimur sem eftir eru í átta liða úrslitum Evrópumótsins.
„Það er ekkert sjálfgefið að koma til baka eftir að hafa verið sex mörkum undir gegn svo sterku liði,“ segir Einar Andri ennfremur.
Hann segir íslenska liðið hafa nýtt sér á lokakaflanum að portúgalska liðið varð manni færra og missti við það dampinn. Tvö mörk á síðustu mínútunni og markvarsla Ísaks Steinssonar eftir að leikurinn var úti tryggði stigið. „Það voru allir tilbúnir að leggja í púkkið sem var grunnurinn að því að við komum til baka,“ segir Einar Andri ennfremur.
Dóri ákvað að fara í sjö á sex
Íslenska liðið vann boltann þegar 17 sekúndur voru til leiksloka, marki undir eftir að Elmari Erlingssyni var rutt um kolla þar sem hann stóð í vörninni.
„Dóri [Halldór Jóhann Sigfússon þjálfari] ákvað að við færum í sjö á sex. Birkir gerði mjög vel að koma boltanum á Skarphéðinn sem skoraði. Það var mjög sætt,“ segir Einar Andri Einarsson annar þjálfari U20 ára landsliðsins í handknattleik í samtali við handbolta.is í Slóveníu í dag.
Talsvert lengra myndskeiðsviðtal er við Einar Andra efst í fréttinni.
Valdi tímann til að verja fyrsta vítakastið – „Þetta var bara geggjað“
EMU20 karla: Leikir, úrslit og staðan, riðlakeppni
Ísak og Skarphéðinn tryggðu sætt stig
