„Það var svekkjandi hvernig botninn datt úr þessu hjá okkur á lokakaflanum eftir að hafa leikið frábærlega. Ljóst að við verðum að fara vel yfir hvað fór úrskeiðis. Á þessari stundu átta ég mig ekki á því,“ sagði Sunna Jónsdóttir landsliðskonan þrautreynda þegar handbolti.is hitti hana að máli eftir síðari leikinn við B-landslið Noregs á Ásvöllum í dag. Íslenska liðinu féll allur ketill í eld síðustu 10 til 15 mínúturnar og missti sjö marka forskot niður í þriggja marka tap.
„Það eru vonbrigði hvernig fór vegna þess að við vorum búnar að leika mjög vel, ekki bara í 45 mínútur í dag heldur einnig í fyrri leiknum,“ sagði Sunna sem var ekki viss um hvað hafi gerst því lítið breyttist í leik norska liðsins sem riðlaði leik íslenska landsliðsins þannig að botninn datt úr.
Einkum var það sóknarleikurinn sem hikstaði hjá íslenska liðinu á lokakaflanum.
„Mér finnst eins og við höfum skemmt svolítið þá vinnu sem við höfum lagt að baki síðustu daga sem hafa verið frábærir að mínu mati,“ sagði Sunna.
„Við verðum að draga okkar lærdóm af þessu fyrir framhaldið. Hvað sem þessu líður þá erum við á réttri leið þrátt fyrir þetta bakslag sem við verðum að setjast yfir og skoða hvað kom fyrir áður en að leikjunum við Ungverja kemur í næsta mánuði,“ sagði Sunna Jónsdóttir landsliðkona í handknattleik í samtali við handbolta.is á Ásvöllum.
