Íslenska landsliðið vann síðasta leik sinn á heimsmeistaramóti 20 ára landsliða í kvenna í morgun þegar leikið var um sjöunda sæti við Sviss, 29:26. Ísland var einnig yfir að loknum fyrri hálfleik, 14:12. Leikurinn fór fram í Boris Trajkovski Sports Center í Skopje og hófst klukkan átta í morgun, tíu að staðaríma.
Sjöunda sæti á heimsmeistaramóti er besti árangur sem yngri landslið Íslands í kvennaflokki hafa náð. Liðið var hársbeidd frá því að slá út Evrópumeistara Ungverja í átta liða úrslitum og ná sæti í undanúrslitum.
Um leið og íslenska liðið lék sinn síðasta leik á mótinu lauk samveru hópsins sem hefur nær því verið saman frá 2021 þegar farið var æfingaferð til Færeyja og á Evrópumót B-liða í Litáen um sumarið. Tíu af þeim sem skipuðu liðið í dag voru í liðinu sem hafnaði í 2. sæti í B-keppninni í ágúst 2021. Þess utan voru 13 af 16 leikmönum liðsins í dag í 18 ára landsliðinu sem hafnaði í áttunda sæti á HM í Norður Makedóníu fyrir tveimur árum.
Leikurinn í dag einkenndist svolítið af því að komin er þreyta í leikmenn sem er eðlilegt eftir átta leiki á mótinu og þrjá æfingaleiki á 16 dögum. Mikið var um einföld mistök og talsverðar sveiflur í leiknum.
Íslenska liðið var yfirhöfuð sterkara, ekki síst síðustu tíu mínúturnar þegar það tryggði sér afar góðan sigur, kærkominn og verðskuldaðan.
Mörk Íslands: Inga Dís Jóhannsdóttir 7, Elín Klara Þorkelsdóttir 5, Elísa Elíasdóttir 4, Rakel Oddný Gudmundsdóttir 3, Embla Steindórsdóttir 2, Alfa Brá Oddsdóttir Hagalín 2, Brynja Katrín Benediktsdóttir 1, Katrín Anna Ásmundsdóttir 1, Lilja Ágútsdóttir 1, Hildur Lilja Jónsdóttir 1, Sonja Lind Sigsteinsdóttir 1, Tinna Sigurrós Traustadóttir 1.
Varin skot: Ethel Gyða Bjarnasen 6, 30% – Anna Karólína Ingadóttir 3/1, 20%.
Handbolti.is fylgdist með leiknum í textalýsingu beint úr keppnishöllinni.
