Theodór skrifaði undir nýjan samning við Fram

Vinstri hornamaðurinn Theodór Sigurðsson hefur skrifað undir áframhaldandi samning við handknattleiksdeild Fram.

Theodór hefur staðið sig vel með liði Fram á keppnistímabilinu. Hann hefur spilað 21 leik á tímabilinu og skorað í þeim 35 mörk.

„Hann hefur sýnt mikinn stöðugleika, baráttu og framþróun í sínum leik og er mikilvægur hlekkur í leikmannahópi Fram,“ segir í tilkynningu handknattleiksdeildar Fram.

Theodór verður í eldlínunni með Fram þegar liðið leikur við Val um Íslandsmeistaratitilinn. Fyrsti leikurinn verður á Hlíðarenda fimmtudaginn 15. maí. Svo skemmtilega vill til að bróðir Theodórs, Viktor, leikur með Val.