„Þetta var svakalega mikill munur en á móti kemur að maður vissi ekki alveg við hverju mátti búast af Stjörnunni,“ sagði Elín Rósa Magnúsdóttir markahæsti leikmaður Vals í stórsigrinum á Stjörnunni í Meistarakeppni HSÍ í dag, 29:10, þegar handbolti.is hitti hana að máli eftir viðureignina sem var leikur kattarins að músinni.
„Við höfðum ekkert mætt þeim fyrir tímabilið og renndum þar af leiðandi blint í sjóinn. Við fókuseruðum á okkur og það tókst vel. Undirbúningurinn var góður hjá okkur,“ sagði Elín Rósa sem skoraði sjö mörk.
Breiddin er heldur að aukast í leikmannahópi Vals því Lovísa Thompson lék með í dag eftir tveggja ára fjarveru auk þess sem Elísa Elíasdóttir kom til Vals í sumar frá ÍBV. Þá eru leikmenn fjarverandi vegna meiðsla. „Við ætlum okkur stóra hluti á tímabilinu og þurftum að hafa fyrir því þótt munurinn hafi verið mikill í þessum leik þá á keppnin eftir að aukast,“ sagði Elín Rósa Magnúsdóttir leikmaður Vals.
Sjá einnig: Ótrúlegir yfirburðir Valskvenna
