Arnar Daði Arnarson handknattleiksþjálfari og umsjónarmaður hlaðvarpsþáttarins Handkastið segist á Twitter hafa áreiðanlegar heimildir fyrir að Carlos Martin Santos þjálfari karlaliðs Harðar á Ísafirði eigi í viðræðum við ÍBV um að verða aðstoðarþjálfari liðs Íslandsmeistaranna.
Arnar Daði segir jafnframt að Santos sé samningsbundinn handknattleiksdeild Harðar. Þar af leiðandi komi viðræður hans og ÍBV mönnum vestra mjög á óvart.
„Það er allt brjálað,“ sagði viðmælandi handbolti.is í morgunsárið.
Samkvæmt áreiðanlegum heimildum Sérfræðingsins er Spánverjinn, Carlos Martin Santos langt kominn í samningaviðræðum við ÍBV að gerast aðstoðarþjálfari liðsins. Carlos er samningsbundinn Herði á Ísafirði og kemur þetta mál Ísfirðingum í opna skjöldu. Áhugavert mál. #Handkastið pic.twitter.com/uGLMlyjvT6
— Arnar Daði (@arnardadi) July 4, 2023
Athyglisvert er að Vigdís Pála Halldórsdóttir formaður handknattleiksdeildar Harðar skrifar undir færslu Arnars Daða og vísar fregninni síður en svo á bug.
Santos hefur þjálfað hjá Herði síðustu fjögur ár.
