Carlos Ortega þjálfari handknattleiksliðs Barcelona, sem landsliðsmarkvörðurinn Viktor Gísli Hallgrímssonar leikur með, hefur verið úrskurðaður í eins leiks keppnisbann á vegum EHF og til greiðslu sektar vegna óíþróttamannslegrar framkomu eftir viðureign Barcelona og Wisla Plock í Meistaradeild Evrópu sem fram fór í Plock í Póllandi 23. september. Xavier Sabate þjálfari Wisla Plock verður einnig að greiða sekt vegna framkomu sinnar.
Eftir því sem fram kemur í úrskurði EHF í dag sló í brýnu á milli Ortega og Sabate eftir viðureign liðanna. Munu báðir hafa hagað sér á ósæmilgan hátt. Ortega var þó hálfu verri en Sabate, samkvæmt skýrslu dómara og eftirlitsmanns.
Ortega var úrskurðaður í eins leiks bann og til greiðslu 1.500 evra í sekt, jafnvirði 220 þúsund kr. Sabate verður að reiða fram 750 evrur í sekt, um 110 þúsund kr í sekt en sleppur við leikbann.
Í banni á heimavelli
Ortega verður þar af leiðandi í banni þegar Barcelona tekur á móti Wisla Plock í Barcelona á fimmtudaginn í næstu viku en þá hefst síðari helmingur riðlakeppni Meistaradeildarinnar. Sabate verður hinsvegar á hliðarlínunni hjá Plock.
